Read on Twitter
طيب بمناسبة العنف الأسري هافضفض حبة بس بالراحة عليا عشان أنا مستوية ..والدي طول عمره قاسي علينا وأبسط حاجة كان بيستخدمها العنف اللفظي واحيانا الجسدي كمان بالإضافة لعدم إظهار المشاعر نهائيا ودا لو بإيدي كنت جرمت الفعل دا لإنك مادام اتجوزت وخلفت يبقى لازم تظهر الحب والمشاعر لأولادك
إللي مالهمش دعوة ولا ذنب في عقدك الشخصية .. انا كائن ضعيف محتاج يحس بالحب والاحتواء والدلع والطبطبة .. يحس إن أهله واقفين جنبه وساندينه وفخورين بيه ومتقبلينه بعيوبه واختلافاته أيا كانت ..
العلاقة المتوترة دي بيننا وبين والدي أدت لتشويه صورة الجنس الآخر تماما في ذهننا بالإضافة للإحساس الدائم بعدم الأمان وعدم الثقة في الآخرين لإن أقرب الناس كنموذج هو أول حد قام بالخذلان ومن وقت مبكر جدا !
ياما فكرت في الاستقلال بالحياة وكنت لسة بنوتة صغيرة والحمد لله إني ماقدرتش لإني كنت هاتبهدل أكتر بكتير وشفت نماذج لبنات أهاليهم كانوا عامل منفر وطارد ليهم والمجتمع بهدلهم واستغل ظروفهم بمنتهى القسوة !
النتيجة كانت دايما فشلنا في العلاقات المستمرة لأسباب كتير من أهمها عن نفسي مش شايفة أي أهمية لتكوين "عيلة" ولا حاسة باحتياج حقيقي لزوج ممكن يكون نفس الصورة المشوهة للأب .. وشايفة إن علاقات تانية كتير ممكن تكون أهم ومشبعة لنفسي أكتر ..
زي علاقة الصداقة والزمالة والجيرة والعلاقات الإنسانية كلها غير المجبرين عليها عكس علاقات الدم والنسب مثلا .. هتقولولي طب وباباكي حاليا بتتعاملي معاه إزاي وهو ٨٥ سنة وفي احتياج ليكي دائم زي الطفل ؟!
دي معضلة حقيقية فعلا .. أختي مثلا اختارت إنها تبعد لإنها مش قادرة تسامحه إنه بوظ حياتها .. أنا شخصيا ماليش حق الاختيار .. هو أنا سامحته أو باحاول أسامحه أو معتقدة دا الله أعلم أنا نفسي ماعرفش لغاية دلوقتي لإني ماتحطتش في اختبار حقيقي ..
متحملة المسؤولية والعبء اضطرار مش اختيار .. هو بمعنى أصح اختبار أو ابتلاء ماعرفش بس إللي أعرفه إنه كان لازم أعمل كدا .. كل دا كلام عادي الناس ممكن تتقبله بس القاسي في الموضوع وهنا النقطة المهمة إني مش باعمل دا بحب .. مش باعمل دا بحنان !
أنا آسفة أنا بامارس بر الوالدين زي ما بيقول ربنا لكن مش قادرة اعمله بحب يا جماعة .. عشان أنا ما أخدتش الحب والحنان والرعاية والتفهم منه وأنا صغيرة .. وبجد إحساسي حاليا لو ديمة بنتي هتاخد بالها مني وأنا كبيرة وداخليا من غير حب يبقى هاوصيها توديني دار رعاية أحسن .. !
لما والدتي الله يرحمها تعبت الوضع كان مختلف لأنها كانت قريبة مننا قوي وحنينة علينا وصاحبتنا كلنا حتى أنا البنت الأصغر .. فكانت رعايتها بمنتهى الحب والتفاني .. وخفيفة على نفسنا ..
ديمة وهي ٧ سنين كان عندي اكتئاب شديد نتيجة لظروف فبدأت أمارس معاها بعض العنف فترة وبعدها تابعت مع دكتور نفسي ووقفت وقفة مع نفسي لما لاقيتني باتحول لصورة من والدي !! قررت أتعالج وأهدا وأقرب من بنتي وأصاحبها ودا إللي حصل فعلا ..
أكيد ناس كتير هتبعت تقولي معلش واستحملي باباكي ودا أجر وثواب وهيتردلك والكلام الحلو دا بس الحقيقة أنا مستحملة وما اشتكتش بالعكس .. 
https://abs.twimg.com/emoji/v2/... draggable="false" alt="🤷♀️" title="Achselzuckende Frau" aria-label="Emoji: Achselzuckende Frau">
مغزى كلامي بدل ما تربوا عيالكوا ع القسوة وتبوظوا حياتهم وبالتالي يبوظوا حياة عيالهم وتبقى دايرة ماتنتهيش وفي الآخر تطالبوهم بالحب إللي افتقدوه منكم وانتوا في احتياج حقيقي ليهم .......
ربوا عيالكم بحب .. الحب مش بالمدارس الانترناشيونال ولا بتمرين السباحة ولا بهدايا الآيفون .. ولا دروس تحفيظ القرآن ولا توليع شمعة في الكنيسة كل يوم حد .. وكمان مش بالضرب والترهيب والعنف الجسدي واللفظي وتكسير المقاديف والسخرية والكبت ومنع كل شيئ حتى النَفَس !
الحب مش مشاعر مكبوتة وخلاص .. ولا هو كلام مزوق .. الحب فعل وممارسة ولازم تظهروه لولادكم عشان ما يعيشوش طول عمرهم يدوروا عليه ومايشبعوش منه حتى لو لاقوه .. الشبع بيكون من الطفولة ..
ودا ولا نصح ولا وعظ ولا إرشاد كنت نفعت نفسي .. أنا بافضفض وبس .. وأذكر نفسي وإياكم .. ربنا يساعدني أشيل حمل والدي من غير ما أقع نفسيا .. ويساعدني أشارك بنتي تجربة الحياة بحب وصداقة وحنان وتفهم .. ويساعدني على نفسي .. دمتم بخير ..
